ქალაქ ონში მცხოვრები მოსახლეობის საყურადღებოდ

16 მარტს, ქალაქ ონში წყალმომარაგების სისტემის რეაბილიტაციისთვის საპროექტო-სამშენებლო სამუშაოების დაწყებასთან დაკავშირებით, ტენდერში გამარჯვებული კომპანიის „საბა“ წარმომადგენლები, ონის მუნიციპალიტეტის ხელმძღვანელ პირებთან ერთად, საინფორმაციო შეხვედრას გამართავენ ადგილობრივ მოსახლეობასთან.

შეხვედრები ქალაქ ონში შემდეგი გრაფიკით გაიმართება:

I ლოკაცია – 13:00 სთ, ვახტანგ VI ქუჩა (მუხასთან) არტუანის უბნიდან გიორგი მაისურაძის ქუჩის ჩათვლით.

II ლოკაცია – 14:00 სთ, ჯიმი მაისურაძის ქუჩა აღმაშენებლის მოედნიდან ჯიმი მაისურაძის ქუჩის ჩათვლით.

Ill ლოკაცია – 15:00 სთ, გვანცა დედოფლის ქუჩა, გვანცა დედოფლის ქუჩიდან ჭავჭავაძის ქუჩის ჩათვლით.

IV ლოკაცია – 16:00 სთ, სააკაძის ქუჩა (მრავალბინიან საცხოვრებელ კორპუსებთან) სააკაძის ქუჩიდან მოედნის ჩათვლით.

შეგახსენებთ, რომ რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია, ონში წყალმომარაგების სისტემის რეაბილიტაციისთვის საჭირო საპროექტო-სამშენებლო სამუშაოებს იწყებს.

შესაბამის ხელშეკრულებას ხელი, წყალმომარაგების კომპანიის დირექტორის მოადგილემ, ნინო ნაროზაშვილმა და ტენდერში გამარჯვებული კომპანია შპს „საბა“-ს დირექტორმა, არჩილ ხაბურძანიამ მოაწერეს.

ონში არსებული წყალმომარაგების ინფრასტრუქტურა მოძველებულია და განახლებას საჭიროებს.

პროექტით გათვალისწინებულია წყლის გამწმენდი ნაგებობის, სატუმბი სადგურის, რეზერვუარისა და საქლორატოროს მოწყობა. დამატებით მოეწყობა,10კმ-მდე წყალმომარაგების სრულიად ახალი ქსელი და 7 კმ ფოლადის მაგისტრალური მილი.

სამშენებლო სამუშაოების დასრულება 2024 წლის ბოლოს არის დაგეგმილი,რომლის შემდეგაც ონის მოსახლეობა 24 საათიანი წყალმომარაგებით იქნება უზრუნველყოფილი.

პროექტისათვის, სახელმწიფო ბიუჯეტიდან, 18 მილიონ ლარზე მეტი გამოიყო.