მიმდინარე წლის 5 ივლისს მოსულმა უხვმა ნალექმა მდ. რიონისა და მისი შენაკადების ადიდება გამოიწვია, რის შედეგად მნიშვნელოვნად დაზიანდა ონის მუნიციპალიტეტის რამდენიმე სოფელი.
სოფ. ღებში მდ. ჩვეშურმა დააზიანა საგლოლო–ღების სახელმწიფო გზის გარკვეული მონაკვეთი, რის გამოც ამ ეტაპზე სოფ. ღები მოწყვეტილია მუნიციპალურ ცენტრს. ადიდებულმა მდინარეებმა სოფ. გონაში წაიღო 2 საავტომობილო ხიდი, სოფ. უწერაში კი დააზიანა ნაპირსამაგრი, რამაც გამოიწვია სასოფლო–სამეურნეო სავარგულების ნაწილისა და მინერალური წყლის ,,ნაპერწკალას“ მიმდებარე ტერიტორიის დატბორვა.
მდინარე რიონმა დააზიანა სოფელ გომთან მისასვლელი ხიდის ბურჯი.
ადიდებულმა მდ. რიონმა საფრთხე შეუქმნა ქ. ონის მარცხენა სანაპიროზე დასახლებულ მოსახლეობასაც.
დილიდან სტიქიის ზონაში იმყოფებიან რეგიონული და ადგილობრივი ხელმძღვანელები შესაბამის სამსახურებთან ერთად.
შექმნილია სამუშაო ჯგუფი, რომელიც სწავლობს ადგილზე არსებულ მდგომარეობას. მიმდინარეობს ზარალის დათვლის სამუშაოები.
